ان کو بھی ہم سے محبت ہو ضروری تو نہیں

ایک سی دونوں کی حالت ہو ضروری تو نہیں

دل کی چاہت تو کئی خواب جگا دیتی ہے

ہاں مگر ساتھ میں قسمت ہو ضروری تو نہیں

میری تنہائیاں کرتی ہیں جنہیں یاد سدا

ان کو بھی میری ضرورت ہو ضروری تو نہیں

بدلی بدلی سی نظر آتی ہے دنیا ہم کو

اس میں ان کی بھی عنایت ہو ضروری تو نہیں

جس کو کہتے ہیں محبت، ہے خدا کی نعمت

سب کی قسمت میں یہ دولت ہو ضروری تو نہیں

چاند چھونے کی تمنّا تو ہے ہم کو بھی مگر

دور کا چاند حقیقت ہو ضروری تو نہیں

مسکرانے سے بھی ہوتا ہے بیانِ غمِ دل

درد کو رونے کی عادت ہو ضروری تو نہیں